¿Qué significa pa vusté’l 8 de setiembre?

Día de la Nación Asturiana

Per segundu añu, Asturies.com púnxose en contautu con delles persones destacaes de la vida social, cultural y artística asturiana pa conocer cómo celebren el Día de la Nación Asturiana y lo que significa pa ellos el 8 de setiembre. Éstes son les sos respuestes.

1. ¿Qué significa pa vusté'l 8 de setiembre?
2.  ¿Qué va facer nesta xornada?

Gaspar Llamazares, diputáu d’Izquierda Xunida

1. Ye’l día de la comunidá política: de la so identidá, de los derechos que nos xunen y les instituciones que nos representen. Una identidá mui debilitada pola política neolliberal y la austeridá, pero tamién pola inercia de la confrontación hacia dientro y del agraviu colo de fuera. Hai que pasar al tiempu del compromisu ente nós y la esixencia de lo nueso.
2. Pasarélo participando nos actos d’Izquierda Xunida.

Damián Barreiro, periodista

1. Ye'l día de tolos asturianos. Ye verdá que me prestaría más otra fecha con más conteníu políticu, pero Cuadonga y esti día tán marcaos a fueu na memoría colectiva de los asturianos. Hai que trabayar pa da-y más conteníu que'l de la la fabada, la tonada y los bolos que va haber en Llastres. Estos elementos tienen que tar representaos un 8-S, pero nun puen ser los únicos que nos representen como colectivu humanu pa un Gobiernu asturianu. Un día asina tien que valir pa reflexonar sobre'l nuestru pasáu, presente y futuru; qué fuimos y qué queremos ser.
2. Voi tar reivindicando una presencia digna pa la llingua asturiana, qu'esti idioma tenga un papel n'Asturies del futuru. Amás, voi facelo –xunto a otra xente– onde una parte importante de la ciudadanía va tar celebrando la so asturianía. Ye probable que tamién pasé por dalgún actu políticu pela mañana. Ye fundamental da-y conteníu políticu y reivindicativu a la xornada.

Enrique López Hernández, diputáu de Podemos

1. El 8 setiembre, pa min, ye’l referente de qu’Asturies, la mio tierra y el mio país, merez el nuestru trabayu y el nuestru compromisu pa salir alantre. Ye un día pa tomar conciencia popular de los problemes y necesidaes que tien esti territoriu y, amás, de qu’hai futuru, pero nun nos lo van regalar. Tenemos claro que vamos tener que puxar por ello. Sicasí, lloñe de la identidá folclórica y relixosa que-y quieren dar al Día d’Asturies, ye menester recordar otres feches propies de la identidá asturiana como’l 25 de Mayu.
2. Voi pasar el día trabayando a primer hora y después voi participar na ‘Folixa’ qu’entamen les Candidatures d’Unidá Popular nel Muséu del Pueblu d’Asturies en Xixón, un actu al que convidamos a les asturianes y asturianos.

Vicente García Oliva, escritor

1. Anque a min nun me preste la fecha, ye'l día de la patria asturiana.
2. Al nun haber actos oficiales creyibles y reivindicativos, nin alternatives idem. xuntarémonos la familia na casina de l'aldea, ya izaremos la nuestra bandera. ¡Ye una pena!

Pablo Suárez García, filólogu, investigador y responsable de la torna al asturianu d’El Quixote

1. Ye'l día de la mio patria, con independencia de que la fecha sía más o menos acertada.
2. Por desgracia, trabayar. Y digo por desgracia porque ello quier dicir que nun trabayo nin vivo n'Asturies, que ye onde tendría que vivir. Esti día, dende l'estierru, faise más vivu'l sentimientu continuu de tar fuera de sitiu.

Paco Ramos, d’Ecoloxistes n’Aición

1. Pa empezar nun soi nada amigo de fiestes y celebraciones, y menos d’una fecha tan mal escoyía na que ta tan presente el caráuter relixosu.
2. Na n’especial. 

Humberto Gonzali, escritor y xestor cultural

1. Ye'l Día de la Nación Asturiana.
2. Taré pel meudía colos/es amigos/ues de la Unión Demócrata Asturiana nuna xinta de xermandá. Pela nueche voi ver una peli n'asturianu en TPA.

Iris Díaz Trancho, maestra y escritora

1. Dende una perspeutiva sincera y tranquila diría que ye, penriba de too, una fiesta popular. Como sabemos, a la escontra de lo que pasa n'otros llugares de la península, la nuestra ‘fiesta’ nun coincide con un fechu históricu. Ye verdá que sería perfectamente posible, non sólo tomando de referencia'l bien revindicáu 25 de mayu, sinón tamién otros como la proclamación en Xixón del Conseyu Soberanu o los llevantamientos de Gonzalo Peláez y Alfonso Enriquez, por poner namás dellos exemplos mui reconocibles. Tampoco creo que pueda rellacionase íntegramente col fechu relixosu, yá que dende'l mio puntu de vista, la figura de La Santina, y tolo que l'arrodia, entamando pola propia imaxe, entra más nel grupu de la cultura popular. Asina lo entendieron persones tan de referecia pa min como Eleuterio Quintanilla y asina lo entiende, creo yo, bona parte de la población; si bien ye verdá que les demostraciones de ‘devoción’ de los nuestros representantes públicos ayuda poco a esta visión. Eliminaes entós les perspectives histórica y relixosa la fiesta queda nesto, en popular, y esi ye'l significáu que yo-y doi. La entruga que pagaría la pena facese ye qué entendemos por popular y qué significáu tenemos que-y dar al términu. Lo que yo creo ye que sobre esa base pue plantegase una xornada de reflexón, acción y dignificación como ciudadanía, esto ye, como pueblu, que tresciende dende llueu a lo que se plantega dende les instituciones asturianes (entamando pol penosu usu del idioma d'esi pueblu y rematando poles actividaes plantegaes).
2. La segunda repuesta ye muncho más curtia. Voi celebralo colgando la bandera del corredor de casa, en Pion, y comiendo cola mio familia demientres falamos d'estes y otres cuestiones. Un día cenciellu y tranquilu.                                     Fonte: asturies.com