L'Alguer acoyó una escuela catalana de branu

L'Alguer acoyó la primer edición d’una escuela catalana de branu.
La Universidá Catalana de Branu de Ciencies de la Natura, que se cellebra dende fai cinco años en Seròs (Lleida), inauguró el pasáu 28 de mayu la so primer edición en L'Alguer, na islla italiana de Cerdeña, col envís d’estrenchar llazos ente los territorios de llingua catalana.

Esta primer edición estrenóse con una ufierta llimitada d’un únicu cursu de cuatro díes nel que participaron once profesores, gracies al sofitu del Institut d’Estudis Catalans (IEC), la Institución Catalana d’Hestoria de la Natura y l’Institutu de Biodiversidá Tropical.
La iniciativa ñaz col oxetivu d’emular l’ésitu de la Universitat Catalana d'Estiu, que se cellebra en Prades, nel sur de Francia, y el de la Universidá Catalana de Branu de Ciencies de la Natural de Seròs, que cada añu ufre ente 20 y 25 cursos cola participación de mediu centenar de profesores de los Països Catalans, Europa y América.

Al cursu monográficu que s’organizó en L'Alguer, baxo’l títulu de "Xestión ya investigación de fauna y ecosistemEs mediterráneos", inscribiéronse más de venti estudiantes.
La voluntá ye cellebrar l’añu qu’entra nesta mesma población una segunda edición de la universidá de branu, anque con mayor ufierta de cursos.

El conseyeru del gobiernu de Cerdeña, destacó la importancia d’esti entamu, que contribuyirá a aofndar nos llazos que xunen a los territorios de llingua catalana, ente ellos L'Alguer, onde la presencia catalana remóntase a 1353. "Trabayamos pa fomentar el pancatalanismu", dixo. Nesta llínia, afitó que "L'Alguer ye una realidá pequeña y aisllada, pero ensin la cuala los Països Catalans nun sedríen tan grandes como son".