La gorda metedura de Gordó

Germá Gordó ye Conseyeru de Xusticia de la Xeneralidá de Cataluña

El paisano llámase Germá Gordó y nun ye un don naide. Ocupa, na menos, que’l cargu de Conseyeru de Xusticia (yo tamién tengo llingua) de la Xeneralidá. Na gloriosa intervención que se-y conoz (seguro que tien otres munches meyores, pero yo nun les conozo) vieno a dicir que, en cuantes Cataluña fuere independiente, pasaría a concede-yos la nacionalidá catalana a los aragoneses y a los valencianos. Y ye que’l señor Gordó ye asina de xenerosu: reparte nacionalidaes como otru reparte rosquilles.

Aprovechando la rebatina, voi a escribi-y una carta a ver si me la pudiere conceder a mí tamién. Nun ye broma, creo tener algamaos méritos suficientes pa ello. Desplicaréme: va tiempu escribí un artículu tituláu Yo quiero ser catalán que, creo, entovía tengo perehí guardáu. Esa trescendental decisión tomela un día en que me llamaron por teléfonu -amás al fiju, que ye más serio- de la Universitat Oberta de Catalunya entrugándome si podíen utilizar textos de llibros míos n’asturianu, pa les sos clases. Ante’l mio plasmu, la moza aquella díxome que nuna asignatura taben estudiando les distintes llingües del Estáu Español, ente elles l’asturianu, y queríen pidime permisu pa emplegar testos míos. Que nun seríen munchos, pues nun queríen abusar. Yo díxe-y a la moza: “Abusen, por favor, abusen lo que quieran que taré encantáu”. Y al ver la mio sorpresa tuvi que dici-y que’l Gobiernu Asturianu nun tenía nengún interés pol tema y d’ehí’l mio plasmu. Total que con esi motivu escribí un artículu nel periódicu (creo que n’Alitar Asturies) con esi títulu de Yo quiero ser catalán.

Cuento too esto pa que se vea que nun tengo nada escontra Cataluña nin la so xente. Lo contrario. Anque lo denacionalizame catalán yera, claro, una broma. El problema surde cuando te quieren nacionalizar ensin contar contigo. Eso sí ye más gordo. Y yo, puestu nel pelleyu d’aragoneses o valencianos, tiraría-yos una trompetilla al señor Gordó y a so señora madre, por metese onde naide los llamó. Ye como si a mi quixeren faceme gallegu, fale yo o non la duce llingua de Rosalía.

Y agora vien una tal Neus Munté, portavoz de la cosa, que diz que bueno, qu’hai que lo matizar. que caún pue ser lo
que quiera (dientro d’un orde, digo yo) y que “respeta el ámbito de decisión de cualquier territorio y de sus instituciones” . ¡Taría coyonudo que nun fuere asina! En fin, que pa esti percorríu nun se necesitaben gües. Caún na so casa y pa tomar cualquier decisión habrá que lo consultar primero, porque l’interlocutor igual nun ta pol  llabor. ¡Gordín, metiste la pata!    Fonte: trabayudecampu. com/Vicente García Oliva/asturies.com

. Vicente García Oliva ye miembru de númberu de l'Academia de la Llingua Asturiana