Educación ufierta a Illán estudiar asturianu nun ciclu inferior al suyu

Educación namás ufierta a Illán la posibilidá d'estudiar asturianu nun ciclu inferior al suyu    L'escolín d'Uviéu, que lleva un mes ensin clas d'asturianu, "nun entiende que la Conseyería d'Asturies quiera qu'estudie francés enantes qu'asturianu".    Illán podrá estudiar asturianu, pero tendrá que facelo nuna clas d'un ciclu inferior al suyu. La familia del escolín de sestu de primaria del colexu Auseva d'Uviéu que denunció públicamente la selmana pasada les torgues de la Conseyería d'Educación pa ufiertá-y la materia yá llogró solución. Illán entamó esta selmana les clases de llingua. En declaraciones a 'Iniciativa pol asturianu nes ondes', Gemma Pulgar, la madre d'Illán, esplicó que "deberá facelo nun ciclu inferior y faciendo daqué modificación nel so horariu pa adautase al nivel que-y correspuende por edá". Pulgar felicítase porque'l so fíu pueda estudiar asturianu casi un mes dempués del entamu del cursu anque llamenta'l "parche". Eslicó que "Illán ve que namás que-y ponen trabes y que tien que dir a contra corriente" y aseguró que "nun entiende que la Conseyería d'Asturies quiera qu'estudie francés".    Iniciativa pol Asturianu llamenta que la Conseyería negóse a ufrir un profesor pal cursu d'Illán, aunque agradez el compromisu del profesor de llingua asturiana asignáu a esti centru cola formación d'esti rapaz, pa lo qu'ufrió toles facilidaes. "El casu nun ye otro qu'una amuesa más del tratu llamentable que da Educación a la llingua asturiana nes escueles ya institutos d'Asturies", señalen dende la organización, qu'esixe "una situación digna" pa la llingua. Pa ello, soliciten a la Conseyera d'Educación que "cumpla cola so promesa de solucionar la reconocencia de la especialidá d'asturianu pa los docentes".    Fonte:  Qué ye ho!com