Educación y Cultura apostará por midíes con baxos costos económicos na promoción del asturianu pola prórroga

La prórroga presupuestaria, como se presuponía, va llendar enforma los planes del conseyeru Alonso na promoción del asturianu. Nuna respuesta a Gaspar Llamazares apunta qu'apostará por midíes con baxos costos económicos.

Genaro Alonso emplegó pa ello l'asturianu, dalgo non habitual dende l'Alministración. En concreto respondió la entruga parllamentaria plantegada por Llamazares '¿Cuál es la situación y cuál será su reflejo en la prórroga presupuestaria de la dignificación, promoción y protección de la llingua asturiana?' con un testu con siete puntos, al que se-y sumen les midíes previstes de normalización llingüística tresversal pa esti añu.

En primer llugar, el conseyeru reconoz al diputáu d'Izquierda Xunida (IX) que l'aumentu de la partida pa l'Academia de la Llingua Asturiana "pue vese dificultada col nuevu escenariu, deriváu de la prórroga presupuestaria". Tamién los pautos colos ayuntamientos pa caltener los servicios de normalización llingüística, anque nesti casu apunta qu'Educación y Cultura va tratar de "realizar una modificación presupuestaria p'atender les peticiones d'estos conceyos". Llanera, Candamu, A Veiga y Grau trabayen anguaño na creación d'estos órganos.

Les ayudes a medios de comunicación, producción editorial y discográfica n'asturianu tampoco nun van disponer del aumentu presupuestariu previstu: "va ser difícil de realizar yá que les modificaciones presupuestaries previstes pa tal fin tendrán que ser destinaes a otros capítulos". No que respeuta los Premios Lliterarios, les recompenses a los ganadores caltendránse, pero nun se podrá crear el gallardón de teatru como se demanda y como tenía previsto la conseyería.

Onde nun paez que vaya haber problemes ye na cantidá destinada al aumentu de fondu bibliográficu pa biblioteques públiques y centros educativos. Por último, Alonso afirma que "la Proposición Non de Llei d'ellaborar un Plan de Normalización Llingüística pue atopar dificultaes nel desarrollu del mesmu. Munches de les midíes previstes nel Plan de Normalización deberíen dir acompañes d'un presupuestu afayadizu pal so desarrollu".

Los planes pa esti añu

Pese a la situación mala que dibuxa Alonso, el conseyeru apunta que tratará de poner esti añu en marcha "midíes de normalización llingüística tresversal que nun arrecostinen con costes económicos o qu'en tou casu éstos seyan asumibles nes circunstancies actuales". Asina cita la edición n'asturianu de les páxines web de tolos organismos de l'Alministración y l'emplegu del idioma na cartelería y comunicaciones.

Tamién comprométese a promover, "al traviés de la negociación y alcuerdos cola dirección de la RTPA, un tratamientu normalizáu de la llingua y aumentu de programes n'asturianu". Otra midida ye'l "diseñu, organización y desarrollu de cursos de formación especialmente dirixíos al personal de medios de comunicación".

L'usu de la toponimia oficializada por parte de tolos organismos oficiales, la dinamización del funcionamientu de la Xunta Asesora de Toponimia, y la coordinación colos distintos servicios de normalización llingüística, asima como de les actividaes d'apoyu rellacionaes cola enseñanza del asturianu y gallego-asturiano, completen la llista de midíes previstes, abierta a iniciatives nueves de promoción del idioma que sían asumibles pola conseyería.Fonte: asturies.com

Adxuntu	Tamañu
respuesta_del_conseyeru_a_llamazares_sobre_prorroga_presupuestaria_y_asturianu.pdf	212.96 KB