16/11/15

El Gobiernu destinará más perres pal asturianu

La financiación de l’ALLA duplicaríase. Educación y Cultura quier dar visibilidá al idioma al traviés d’espectáculos deportivos.

Según una información espublizada na edición del diariu 'La Nueva España', el Gobiernu de la FSA-PSOE destinará más perres pal asturianu nel 2016 tres años de recortes continuos. Sería la manera de cumplir les midíes alcordaes con Izquierda Xunida (IX) nel pautu algamáu cola coalición pa la investidura de Javier Fernández como presidente del país.
L'aumentu de les partíes tendría como destinatariu principal a l'Academia de la Llingua Asturiana (ALLA), que tres años afogada polos retayos, ensin la posibilidá de llevar a imprenta munchos trabayos, vería duplicada la partida actual. La Conseyería d'Educación y Cultura, dirixida nesta llexislatura por Genaro Alonso, tamién pretende acelerar el procesu de recuperación toponímicu, asina como trabayar pol usu de los mesmos por parte de toles alministraciones.
No que respeuta a les subvenciones, éstes tendríen delles modificaciones pa que foran más efeutives, adaptándoles a la realidá d'Asturies y a les necesidaes de los sos solicitantes. Por último, la conseyería pretende aprovechar el tirón de los espectáculos deportivos nel país pa dar mayor visibilidá al idioma.
Fonte: Asturies.com

7 comentarios:

  1. Nesta situación de desamparu oficial toles perres que se dediquen al asturianu son poques.

    ResponderEliminar
  2. Quan diuen "doblar", de quin import estem parlant?

    ResponderEliminar
  3. ...perbona entruga, David, ¿de qué montante económicu tamos falando?

    ResponderEliminar
  4. Lo que ye realmente necesariu y urxente ye la oficialidá del asturianu, lo demás va venir por añadidura.

    ResponderEliminar
  5. Cantidaes concretes nun sé, pero paezme que tornen a lo que daben enantes de los retayos de los dos caberos años.

    ResponderEliminar
  6. El Gobiernu tien qu'aprobar la oficialidá y tou lo demás son cuentos.

    ResponderEliminar

Los comentarios tán pendientes de moderación. Espublizaránse lo primero dable.