Darwin y la llingua asturiana

Bertu Ordiales (La Pola, L.lena) Charles Darwin ye ún de los científicos más ilustres de la humanidá. Autor de la teoría de la evolución, colos sos postulaos revolucionó los cimientos de la especie humana afirmando que tolos seres vivos procedemos d'un antepasáu común. Munches de les conclusiones que lu llevaron a enunciar esta teoría tomóles nuna espedición que fizo per América. Pero ente estos apuntes, tamién-y chocaron otres coses como les que narra nesti comentariu cerca de Río de Janeiro: «Esti llugar ye de sonadía por ser la residencia de dellos esclavos fuxitivos que, cultivando un poco de terrén averáu al cumal, apañáronse pa ganar con munchu esfuerzu la subsistencia. Al final fueron descubiertos, unvióse una partida de soldaos y atrapáronlos a toos, sacante una vieyina que, enantes de que la tornaran a la esclavitú a otra vuelta, aventóse dende l’altu’l monte esfarrapándose. Nunca matrona romana, esto llamaríase’l noble amor a la llibertá; nunca negra probe ye mera obstinación brutal». Por desgracia, esta doble moral na que recaba’l científicu sigue tovía anguaño tando viva. Na hestoria darwiniana rescámplase la diferenciación entre grupos humanos en función del color de piel, pero realmente valen munchos otros argumentos que discriminen ente coleutivos como puen ser la relixón, sexu, raza... o idioma. N’Asturies, precisamente, l’ausencia d’oficialidá de la llingua asturiana certifícalo asina. Una parte mui considerable de la ciudadanía carez del derechu a espresase n’asturianu. Y esta reclamación fundamental que lleva glayándose más de trenta años peles cais, instituciones, asociaciones, partíos políticos, inteleutuales, etcétera sigue, incomprensiblemente, balera. La desigualdá queda patente día tres día cuando unos ciudadanos puen desendolcar la so vida con total normalidá mientres otros deben rectificar de contino la so forma de falar. Esti pilancu a la equiparación en derechos ente unos y otros atenta contra la mesma esencia de lo racional. Dalgo radicalmente antagónico a les tesis de científicos como Darwin que nos empobinaron a desaposiase de tolos prexucios polos que puxábamos, y dir avanzando y progresando hasta la sociedá actual na que toles persones tenemos los mesmos derechos y llibertaes dende que nacemos. Si tornamos a la hestoria, ye esa doble moral la que, énte un mesmu fechu, permite a la sociedá dar dos esplicaciones diferentes. La oficialidá de la llingua asturiana ye una pitición de lo más básico, con resolución inequívoca. Sólo esa doble moral qu’amuesa’l rellatu permite la negación testerona de los derechos más elementales a una parte de la sociedá asturiana. Pero si somos capaces d’aceutar qu’una persona que cambió’l rumbu de la humanidá nun pue tar tracamundiada entós debemos ser capaces d’aceutar que la oficialidá de la llingua asturiana ye un derechu irrefutable. Fonte: La Nueva España