Iniciativa pol Asturianu informa a la RAE pa camudar la definición d'«asturiano»

REDACCIÓN. UVIÉU - El presidente d'Iniciativa pol Asturianu, Inaciu Galán, va tar esti llunes 4 de xunu en Madrid pa presentar en mano énte la Real Academia Española (RAE) un informe tituláu Definir el términu asturianu con xeitu. Informe sobre la presencia del vocablu asturianu y otros términos nos diccionarios normativos d’otres llingües. Según esplica Iniciativa pol Asturianu, ye una propuesta a la RAE pa que’l términu asturiano dexe de referise nel so diccionariu a dialecto «pa responder a la realidá científica y llegal, que dexa a les clares que l’asturianu ye un idioma». Nel diccionariu de la RAE, asturiano aparez namás como axetivu y non como sustantivu pal nome de la llingua, qu'amás defínese como referíu a la 'variedá asturiana del dialectu romance asturleonés'. Como sustantivu namás aparez bable, que se define como 'dialectu de los asturianos'. Otra manera, l'axetivu asturleonés vien como referíu al 'dialectu romance nacíu n'Asturies y nel antiguu reinu de Llión como resultáu de la evolución peculiar esperimentada ellí pol llatín'. Esi tratamientu nel diccionariu de la RAE como dialectu nun lu tienen otres llingües peninsulares como'l catalán o'l gallegu. La propuesta que se fai nel informe suxer definir asturiano como 'llingua romance que se fala n'Asturies y otros territorios del antiguu reinu asturllionés' y bable como 'llingua asturiana'. En cuantes al axetivu leonés, qu'aparez na séptima acepción como la variedá de castellanu falada en Llión, proponen quitala. Tamién destaquen nel informe que'l de la RAE nun ye l'únicu diccionariu que fai de menos al asturianu: el del Institut d'Estudis Catalans defínelo como 'conxuntu de fales lleoneses d'Asturies y una parte de Cantabria' y el de la Real Academia Galega namáis recueye'l nome de bable, que define como 'conxuntu de modalidaes de llingua falaes nel territoriu asturianu (oriental, central y occidental) que deriven de la primitiva llingua asturllionesa'. Avalen esti informe una llista de profesores que l'asociación sigue aumentando. De momentu, de la Universidá d'Uviéu tán Xosé Lluis García Arias, Ramón d'Andrés, Xulio Viejo, Rubén Martín-Llames, Xosé Antón González Riaño y la decana de la Facultá de Filosofía y Lletres, Cristina Valdés. Del ámbitu catalán tán nomes como Agnès Toda i Bonet (Universidá Rovira i Virgili), Antoni-Ignasi Alomar i Canyelles (Universidá de les Isles Baleares), Francesc Massip Bonet (Universidá Rovira i Virgili), Jaume Corbera Pou (Universidá de les Isles Baleares), José Enrique Gargallo Gil (Universidá de Barcelona), Xavier Luna i Batlle (Universidá Autónoma de Barcelona) y Pere Rosselló Bover (Universidá de les Isles Baleares). Tamién apoyen l'informe Naotoshi Kurosawa (Universidá de Tokyo), Alberto Gómez Bautista (Universidá d'Aveiro) y Juan Carlos Moreno Cabrera (Universidad Autónoma de Madrid). Otra manera, Iniciativa pol Asturianu pide la mediación del Gobiernu d'Asturies, l'Academia de la Llingua Asturiana y la Facultá de Filosofía y Lletres de la Universidá d'Uviéu. Pa I'asociación, ye innegable la necesidá de cambiar esta definición del diccionariu de la RAE, «porque ye una cuestión de respetu a la realidá sociollingüística d’Asturies y de los demás territorios asturfalantes». Fonte: Les Noticies