Doblaos al asturianu dos llargumetraxes más

'El tercer Home' y 'Los viaxes de Gulliver' van estrenase esti mes.
Gonzali Producciones tien la intención d’estrenar, na segunda metada d’esti mes d’avientu, dos nuevos llargumetraxes que tán a piques de finar el so doblaxe al asturianu. Trátase d'El tercer home, de Carol Reed, y del clásicu del cine d’animación Los viaxes de Gulliver, dirixíu por Dave Fleischer. Pa estos doblaxes cúntase cola participación d'actores asturianos y al igual que se ficiera nel casu de La nueche de los muertos vivientes, esti versionáu fíxose ensin sovención denguna.

El tercer home (The Third Man) ye una película del Reinu Xuníu dirixida por Carol Reed, escrita por Graham Greene y protagonizada por Joseph Cotten y Orson Welles. Ta considerada la meyor obra fílmica británica de la hestoria. Los interiores rodáronse nos London Films Studios, de Shepperton (Inglaterra), y los esteriores n'Austria. El tercer home recibió'l Gran Premiu del Festival de Cannes y l'Óscar a la meyor fotografía en blancu y prietu, na persona de Robert Krasker. La banda sonora, firmada por Anton Karas, ye una de les más famoses de tolos tiempos. Memorables son tamién diverses escenes de Viena, como la de la noria xigante del Prater o la persecución nes cloaques d'esta ciudá. La primera apaición d'Orson Welles (el movimientu d'una llámpara enseña a Harry Lime énte'l sosprendíu rostru de Joseph Cotten) ta considerada como la meyor presentación d'un personaxe na hestoria del cine. El planu secuencia de la fin tamién se considera como'l meyor de la hestoria.

Los viaxes de Gulliver (Gulliver's Travels) foi el primer llargumetraxe d’animación producíu polos Estudios Paramount, y que tamién foi’l primer filme d’esti xéneru que nun taba venceyáu a los Estudios Disney. La película dirixóla Dave Fleischer y producióla’l so hermanu Max Fleischer, dos piones del cine animáu que nos años cuarenta fueron mui populares polos sos curtiometraxes de Superman. Los guionistes Dan Gordon, Cal Howard, Tedd Pierce, Edmond Seward y Izzy Sparber encargáronse de treslladar a la gran pantalla una parte de la novela de Jonathan Swif, centrada na aventura de Gulliver nel país de Lilliput. Los animadores emplegaron la téunica del rotoscoped en determinaes escenes, aportando un notable realismu al filme, que tien una estupenda calidá d’animación y un bon tratamientu del collor. Na estaya musical ye destacable la banda sonora de Victor Young y que-y valieren a la película dos nominaciones a los Oscar a Meyor banda sonora y Meyor cantar orixinal (pol tema "Faithful Forever").

Fonte: Infoasturies